Eg er klar over at eg går raskare enn dei fleste som går Noreg på langs, men eg tykkjer likevel ikkje at det blir ein mindre innhaldsrik tur. Heller tvert i mot. Mange vil kanskje sei at ein ikkje får nyta naturen fullt ut når ein går så lange og harde dagsetappar som eg har gjort. For meg er naturopplevinga og inntrykka mykje sterkare når ein har gitt av seg sjølv gjennom hard fysisk utfalding, under tunge forhold og med høge krav. Det er slik eg finn livsglede i naturen og det er det som motiverar meg. Dette er min måte å oppleve og nyte naturen i Noreg på. Det er på denne måten eg får dei sterkaste inntrykka og kjenslene, å kjenna på både frustrasjonen ved den sterkaste motgang og gleden av den største oppturen. Det er slik eg kjenner at eg lever.